Блокчейн деген не?

Блокчейн (Blockchain) – бұл мәліметтерді сақтау және децентрализдендірілген компьютерлік желілерді құруға арналған технология. Оның негізінде орындалған операциялар (транзакциялар) туралы ақпаратты жазатын өзгермейтін блоктар тізбегі жатыр. Блокчейн – бұл өзара байланысты қатысушылар арасында таратылған, синхронды түрде жаңартылатын цифрлық бухгалтерлік кітаптың бір түрі. Блокчейннің кеңінен қолданылуы 2009 жылы басталды, оны Сатоши Накамото биткоинді жасау үшін пайдаланды. Биткоин блокчейні пайдаланушылардың транзакцияларын қамтитын блоктардан тұрады. Әрбір жаңа блок алдыңғы блоктармен синхрондалады. Ең маңызды ерекшелігі – жазылған деректерді кейіннен өзгерту мүмкін емес. Блокчейн технологиясы тек криптовалюталармен ғана шектелмейді. Оны сайлау процесінде, жеке тұлғаны сәйкестендіруде, құжат айналымында, логистикада, авторлық құқықты қорғауда және басқа да көптеген салаларда қолдануға болады. Бүгінде блокчейн технологиясына үлкен үміт артылып отыр, өйткені оның кең ауқымды қолданылуы жемқорлықты, делдалдарды және бюрократияны жоюға көмектесуі мүмкін. Кейбір сарапшылар блокчейннің маңыздылығын интернеттің пайда болуымен салыстырады.